ନୂଆଦିଲ୍ଲୀ: ପ୍ରଧାନମନ୍ତ୍ରୀ ଜଣେ ‘ଇଭେଣ୍ଟ ମ୍ୟାନେଜର’ (କାର୍ଯ୍ୟକ୍ରମ ପରିଚାଳକ)। ସେ କେବଳ କେଉଁ ସମୟରେ କେଉଁ କାର୍ଯ୍ୟକ୍ରମ ହେବ ତାହା ହିଁ ଭାବୁଥାଆନ୍ତି। କରୋନା ମୁକାବିଲା ପାଇଁ ତାଙ୍କ ପାଖରେ କୌଣସି ଯୋଜନା ନାହିଁ। ସେ କରୋନା ବିରୋଧରେ ଲଢ଼ିବା ପାଇଁ କୌଣସି ଯୋଜନାବଦ୍ଧ କାର୍ଯ୍ୟକ୍ରମ ବା ରଣନୀତି ସ୍ଥିର କରିନାହାନ୍ତି। ସେ ସେଭଳି ଚିନ୍ତା କେବେ ମଧ୍ୟ କରନ୍ତି ନାହିଁ। ସେଥିପାଇଁ କରୋନାର ଦ୍ବିତୀୟ ଲହରୀ ଭୟାନକ ରୂପ ନେଇଛି। ସାମ୍ପ୍ରତିକ ପରିସ୍ଥିତି ପାଇଁ ପ୍ରଧାନମନ୍ତ୍ରୀ ହିଁ ଦାୟୀ। ଏଭଳି ଆକ୍ଷେପ କରିଛନ୍ତି କଂଗ୍ରେସ ସାଂସଦ ରାହୁଲ ଗାନ୍ଧୀ। ଦେଶବାସୀଙ୍କୁ ଟିକାକରଣ ପାଇଁ କୌଣସି ରଣନୀତି ନ ଥିବାରୁ ଲୋକେ ଟିକାରୁ ବଞ୍ଚିତ ହେଉଥିବା ରାହୁଲ ଅଭିଯୋଗ କରିଛନ୍ତି।
ସରକାରଙ୍କ ଯୋଜନାରେ ଦେଶର ମାତ୍ର ୩ ପ୍ରତିଶତ ଜନତା ଟିକା ପାଇଥିବାବେଳେ ୯୭ ପ୍ରତିଶତ ସଂକ୍ରମିତ ହୋଇଛନ୍ତି। ମୋଦୀ ସରକାର କି ଲଢ଼େଇ ଲଢ଼ୁଛନ୍ତି ତାହା ନିଜେ ବୁଝିପାରୁ ନାହାନ୍ତି। ଭୂତାଣୁର ରୂପାନ୍ତରଣ ଜନିତ ବିପତ୍ତିକୁ ବୁଝିପାରୁ ନ ଥିବାରୁ ସରକାର ଦେଶବାସୀଙ୍କୁ ସଂକଟ ମଧ୍ୟକୁ ଠେଲି ଦେଇଛନ୍ତି ଓ ବିଶ୍ବବାସୀଙ୍କ ସମ୍ମୁଖରେ ଅଯଥା ବୋଝ ପାଲଟି ଯାଇଛନ୍ତି। କରୋନାର ପ୍ରଥମ ଲହରୀ ସମୟରେ କେହି କିଛି ବୁଝିପାରି ନ ଥିେଲ; କିନ୍ତୁ ଦ୍ବିତୀୟ ଲହର ପ୍ରଧାନମନ୍ତ୍ରୀଙ୍କ ଯୋଗୁଁ ଭୟଙ୍କର ହୋଇଛି ଏବଂ ତାଙ୍କ ନାଟକକୁ ଲୋକେ ବୁଝି ଗଲେଣି। ଦାୟିତ୍ବ ସମ୍ପାଦନରେ ତାଙ୍କର ବ୍ୟର୍ଥତା ପ୍ରମାଣିତ ହୋଇଛି। ଏହା ହିଁ ଦ୍ବିତୀୟ ଲହରର କାରଣ। ମୁଁ ତାଙ୍କୁ ପ୍ରତ୍ୟକ୍ଷ ଭାବେ ଟିକାକରଣ ସମ୍ପର୍କରେ ବୁଝାଇଥିଲି; କିନ୍ତୁ ସେ କିଛି ଶୁଣିଲେ ନାହିଁ। ସେ ଏମିତି ଦୁନିଆରେ ରହୁଛନ୍ତି ଯେ ତାଙ୍କୁ କାହା କଥା ଶୁଭେ ନାହିଁ। ଏବେ ସେ ଲୋକଙ୍କ ଦୁଃଖ ଦୁର୍ଦଶା ମୋଚନ କରିବା ପରିବର୍ତ୍ତେ ନିଜର ଭାବମୂର୍ତ୍ତି ସଜାଡ଼ିବାକୁ ବ୍ୟଗ୍ର ବୋଲି ରାହୁଲ ଆକ୍ଷେପ କରିଛନ୍ତି। ଅପରପକ୍ଷରେ ମଧ୍ୟପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ କମଲନାଥ କହିଛନ୍ତି ଯେ ସରକାରଙ୍କ ଯୋଗୁଁ ଭାରତ ଏବେ ଆଉ ‘ମହାନ୍’ ହୋଇ ରହି ନାହିଁ; ‘ବଦନାମ୍’ ହୋଇଯାଇଛି। ଭାରତ ଉପରେ ବିଶ୍ବର ପ୍ରାୟ ସବୁ ରାଷ୍ଟ୍ର କଟକଣା ଲଗାଇଛନ୍ତି। ବିଦେଶରେ ଭାରତୀୟଙ୍କ ଗାଡ଼ିରେ କେହି ବସୁ ନାହାନ୍ତି। ଭୁଲ୍ ଟିକା ନୀତି ଯୋଗୁଁ ଭାରତ ପ୍ରଥମେ ଟିକା ରପ୍ତାନି କଲା; ଏବେ ଆମଦାନୀ କରୁଛି ବୋଲି ସେ କହିଛନ୍ତି।